Shehzad Roy will be awarded his second Sitara-e-Imtiaz today 135

شہزاد رائے کو دوسری مرتبہ ستارہ امتیاز سے نوازدیا گیا

کراچی: نامورگلوکار اورسماجی کارکن شہزاد رائے کو دوسری مرتبہ ملک کے تیسرے بڑے سول اعزاز ستارہ امتیاز سے نوازدیاگیا۔

گلوکار شہزاد رائے کا شمار نہ صرف پاکستان کے بہترین گلوکاروں میں ہوتا ہے بلکہ وہ سماجی خدمات میں بھی پیش پیش رہتے ہیں۔ یہی وجہ ہے کہ ان کی سماجی خدمات کے صلے میں پاکستانی حکومت کی جانب سے ایک بار پھر پاکستان کے معتبر ترین ایوارڈ ستارہ امتیاز سے نوازدیا گیا۔

شہزاد رائے نے حکومت کی جانب سےایوارڈ ملنے کی خوشخبری ٹوئٹر پر تمام لوگوں کے ساتھ شیئر کرتے ہوئے لکھا کہ ”مجھے معلوم ہے کہ ہمارے ملک میں بہت سارے ہیروز سماج کی بہتری اور معاشرے کی فلاح کے لیے بے لوث خدمت کررہے ہیں لیکن انہیں عوامی طور پر کوئی نہیں پہچانتا، میں یہ ایوارڈ ان تمام لوگوں کے نام کرتا ہوں۔“

شہزاد رائے کو ستارہ امتیاز سے نوازے جانے پر ان کے چاہنے والوں سمیت شوبز سے تعلق رکھنے والے فنکاروں نے بھی خوشی کا اظہار کیا۔ گلوکارواداکار علی ظفر نے ٹوئٹ کرتے ہوئے انہیں مبارکباد دی اور کہا کہ ”ہمیں ا?پ پر فخر ہے سر“۔

شہزاد رائے کو گزشتہ برس اقوام متحدہ کے ذیلی ادارے برائے انسداد منشیات اور جرائم کا اعزازی سفیر نامزد کیا گیا تھا جب کہ رواں ماہ 12 مارچ کو شہزاد رائے نے یواین او ڈی سی اجلاس میں پاکستان کی نمائندگی بھی کی تھی۔ شہزاد رائے کی این جی او کو 2005 کے زلزلے میں متاثرین کی بحالی کے لیے خدمات سرانجام دینے پر بھی ستارہ امتیاز سے نوازا گیا تھا۔

واضح رہے کہ ستارہ امتیاز پاکستان کا تیسرا بڑا سول اعزاز ہے جوانفرادی طور پر پاکستان کی سیکیورٹی، مفادات، عالمی امن، ثقافت اور عوامی خدمت کے لیے اہم کردار ادا کرنے والےافراد کو نوازا جاتا ہے۔

اس خبر پر اپنی رائے کا اظہار کریں

اپنا تبصرہ بھیجیں