وزیراعظم کا شہریوں کو جھانسہ دیکر باہر بھجوانے والوں کیخلاف سخت کارروائی کا حکم

اسلام آباد: وزیراعظم شہباز شریف نے معصوم پاکستانیوں کو جھانسہ دیکر غیر قانونی طریقوں سے بیرون ملک لے جانیوالوں کیخلاف سخت کارروائی کی ہدایت کردی۔ وزیراعظم کی زیرصدارت یونان میں کشتی الٹنے کے حادثے میں پاکستانیوں کی اموات اور انسانی سمگلنگ کی روک تھام کے حوالے سے اجلاس منعقدہوا۔اجلاس کے دوران شہباز شریف نے 2023کے کشتی حادثے کے بعد ایسے عناصر کیخلاف کارروائی میں سست روی پر برہمی کا اظہار کیا، وزیراعظم نے سست روی میں ملوث افسران کیخلاف کارروائی کرنے کی ہدایت کردی۔انہوں نے کہا گزشتہ سال یونان کے اسی علاقے میں ایک دردناک واقعہ ہوا جس میں 262 پاکستانی جاں بحق ہوئے، انسانی سمگلنگ پاکستان کیلئے دنیا بھر میں بدنامی کا باعث بنتی ہے لہٰذا اس کو روکنے کیلئے ٹھوس اقدامات کی ضرورت ہے، سست روی سے لئے گئے اقدامات کی بدولت اس قسم کے واقعات کا دوبارہ رونما ہونا لمحہ فکریہ ہے،معصو م پاکستانیوں کو جھانسہ دیکر غیر قانونی طریقوں سے بیرون ملک لے جانیوالوں کیخلاف سخت کارروائی کی جائے۔
علاوہ ازیں یونان میں گزشتہ دنوں کشتیوں کو حادثے میں جاں بحق پاکستانیوں کی مجموعی تعداد 40 تک پہنچ گئی۔یونان کوسٹ گارڈ نے سمندر میں ریسکیو آپریشن ختم کردیا اور کہا کہ لاپتا افراد کو مردہ تصورکیا جائے۔ذرائع کا کہنا ہے کہ یونان میں 3 مختلف کشتی حادثوں میں 35 پاکستانیوں کے جاں بحق ہونیکی اطلاعات ہیں اور مجموعی تعداد 40 تک پہنچ گئی۔سرکاری ذرائع نے بتایاکہ لیبیا میں ابھی بھی کم وبیش 5 ہزار پاکستانی موجود ہیں اور یورپ جانے کے خواہشمند یہ افراد مختلف پاکستانی ولیبیا کیایجنٹوں کے پاس ہیں۔ذرائع کا کہنا ہے کہ یہ پاکستانی قانونی طور پر پاکستان سے ویزہ لیکر لیبیا پہنچے ہیں۔خیال رہے کہ تین روز قبل یونان کے جزیرہ کریٹ کے جنوب میں کشتیاں الٹنے کا واقعہ پیش آیا تھا جس میں 5 افراد کی ہلاکت کی تصدیق ہوئی تھی جن میں ایک پاکستانی شہری بھی تھا۔اس کے بعد گزشتہ روز مزید 4 پاکستانیوں کی ہلاکت کی تصدیق ہوئی تھی اور درجنوں لاپتہ تھے۔ کشتیاں الٹنے کے واقعے میں بچائے گئے افراد میں سے 47 پاکستانی شامل ہیں۔ حادثہ میں علاقہ رتی ٹھٹ کے رہائشی 2 سگے بھائی بھی لاپتہ تھے۔دونوں نوجوان وقاص اور وقار آپس میں سگے بھائی ہیں، دونوں بھائی ایک ماہ قبل عازم سفر ہوئے تھے، چند روز قبل گھر والوں کو بتایا کہ یورپ جانے کے لیے کشتی پر سوار ہونے جا رہے ہیں۔اہل خانہ نے بتایا کہ دوبارہ ان سے کوئی رابطہ نہیں ہو رہا، اہل خانہ غم سے نڈھال ہیں اور حکومت سے مدد کی اپیل کر رہے ہیں۔