قاضی بے نقاب

ساری سرکاری مشینری لندن پلان کو بہت تیزی سے آگے بڑھا رہی ہے۔ اقتدار میں حائل آخری رکاوٹ ”بلے“ کو بھی قاضی نے اپنے پورے کیریئر کو داﺅ پر لگاتے ہوئے گرادیا اور اب یہ بات روز روشن کی طرح سے عیاں ہوتی جارہی ہے کہ 8 فروری کو سلیکشن کے ذریعے بدنصیب پاکستان میں کس طرح کا سورج طلوع ہونے جارہا ہے؟ جو لوگ اس طرح سے کرکے بدنصیب پاکستان کی سلامتی سے کھلواڑ کررہے ہیں وہ ایسا کرتے ہوئے یہ بھول رہے ہیں کہ ان کے یہ تمام تر کارستانیاں ہی دراصل سابق وزیر اعظم عمران خان کے تحریک حقیقی آزادی کی ایک طرح سے مارکیٹنگ کررہے ہیں۔
پاکستانی سسٹم کے پوری طرح سے کمپرومائیز کئے جانے سے یہ بات پوری طرح سے ثابت ہورہی ہے کہ واقعی پاکستانی قوم غلام بن چکی ہے اور انہیں حقیقی آزادی کی ضرورت ہے اور اس آزادی کے لئے پاکستان میں ”رولز آف لائ“ کی اشد ضرورت ہے۔ قانون کی بالادستی اور جمہوریت کا آپس میں چولی دامن کا ساتھ ہے جس طرح سے انسان اور روح کا آپس میں تعلق ہے وہی تعلق جمہوریت کا اور قانون کی بالادستی کا آپس میں ہے، یہ نہیں ہو سکتا کہ ملک میں جمہوریت تو ہو مگر قانون کی بالادستی نہ ہو، یہ ممکن ہی نہیں۔ ہوں گیں تو دونوں ہوں گیں ورنہ کوئی ایک بھی نہیں؟
پہلے بھی ان ہی کالموں میں یہ ہی رونا رو چکا ہوں کہ پاکستان کا اصل معاملہ نہ تو کرپشن کا ہے اور نہ ہی معاشی بحران کا، اصل بیماری ملک میں قانون کی بالادستی کا نہ ہونا ہے، کمزور کے لئے ملک میں الگ اور طاقتور کے لئے الگ قانون ہیں، پچھلے دو سالوں کے دوران پوری قوم نے پولیس اور عدلیہ کی جانب سے اس طرح کے دوہرے طرز عمل کے مظاہر اپنی آنکھوں کے سامنے دیکھ لئے، حالات اور واقعات نے عمران خان کی کی جانے والی ایک ایک بات تمام تر شواہد کے ساتھ ثابت کردی۔ پوری قوم کو اپنی غلامی کا احساس ہو گیا ہے اور 76 برسوں میں یہ پہلے انتخابات ایسے ہونے جارہے ہیں جس میں پاکستانی عوام اپنے قیمتی ووٹوں کا استعمال مہنگائی کے خاتمے یا بے روزگاری سے نجات کے لئے نہیں کرنے جارہے ہیں بلکہ پہلی بار ملکی عوام اپنے ووٹوں کا استعمال اس بدبودار نظام کے خاتمے کے لئے کرنے جارہے ہیں جس نے ملک اور اس کے رہنے والوں جکڑ کر رکھا ہوا ہے، انہیں غلام بنایا ہوا ہے اور اپنے فیصلے ان پر کبھی قوم کے وسیع تر مفاد کے نام پر اور کبھی ملک کے مفاد کے نام پر مسلط کرتے چلے آرہے ہیں۔
آج ماشاءاللہ پاکستانی قوم پوری طرح سے بیدار ہو چکی ہے اور وہ اپنے اصل دشمنوں کو جان بھی چکی ہے اور پہچان بھی چکی ہے کہ ان کے استحصال کرنے والے کوئی اور نہیں خود ان کے اپنے ہیں جو ان کا خون چوس کر خود عیاشیاں کررہے ہیں۔ یہ ملک چند لوگوں کا نہیں بلکہ 25 کروڑ لوگوں کا ہے۔ آج جس طرح سے پاکستان کی آزاد میڈیا نے خود اپنے غلام ہونے کی بدترین مثال قائم کرکے پوری قوم کو گمراہ کرنے کی ذمہ داری سنبھالی ہے اس کی بھی کوئی نظیر نہیں ملتی۔ اسی طرح سے پاکستانی عدلیہ نے تو انصاف کے نام کو اپنے جانبدارانہ فیصلوں کے ذریعے جو چار چاند لگائے ہیں وہ بھی اس وقت پوری دنیا میں پاکستان کی جگ ہنسائی کا باعث بنا ہوا ہے۔ دنیا پاکستانی عوام کی طرح سے نہ تو اتنی ان پڑھ ہے اور نہ ہی اتنی بے وقوف کہ وہ صورتحال کو سمجھنے کا فہم و ادراک رکھتی ہے۔ برطانوی جریدی اکنامکس میں عمران خان کے آرٹیکل کو دنیا بھر میں ملنے والی ریکارڈ ترین پذیرائی نے پوری دنیا کے سامنے امریکی انتظامیہ کا بدبودار چہرہ بالخصوص اور پاکستانی سسٹم کا چہرہ بالعموم پوری طرح سے بے نقاب کردیا ہے کہ پاکستان میں جمہوریت اور انتخابات کے نام پر کون سا ناٹک رچایا جارہا ہے اور پاکستان کی عدلیہ اور دوسری سرکاری مشینری کس طرح سے سہولت کاری کا کردار ادا کرکے ملک کی سب سے بڑی سیاسی جماعت کو اس انتخابات سے دور کررہی ہے اور سیاسی ڈاکوﺅں کے لئے راہیں ہموار کررہی ہے۔ اکنامکس کے اس عمران خان کے آرٹیکل نے پوری دنیا میں ایک آگ لگا دی ہے اور بدنصیب پاکستان کو غلام بنانے والی طاقتیں پوری طرح سے بے نقاب ہو چکی ہے۔
اب 8 فروری کا یہ الیکشن ماسوائے خانہ پُری کے اور کچھ بھی نہیں ہے اور یہ ساری صورتحال ملک کی سلامتی اور بقاءکے لئے زہر قاتل بنتی چلی جارہی ہے۔