اسلام آباد (نیوز ڈیسک) وزیر اعظم شہباز شریف نے ایران کے رہبر معظم مجتبیٰ خامنہ ای کو ایک خط لکھا ہے جس میں ان کے والد محترم ، ایران کے سپریم لیڈر آیت اللہ سید علی خامنہ ای کی شہادت پر تعزیت کا اظہار کیا ہے اور انہیں سپریم لیڈر کی ذمہ داریاں سنبھالنے پر مبارکباد بھی دی ہے۔ اپنے پیغام میں وزیر اعظم نے ایران کے برادر عوام اور وسیع تر امت مسلمہ کے لئے پاکستانی عوام کی تعزیت اور دعاو¿ں کا اظہار کیا۔ انہوں نے کہا آیت اللہ سید علی خامنہ ای کی شہادت کی وجہ سے پاکستانی عوام کو شدید دکھ میں ہے اور اس مشکل وقت میں ایران کی قیادت اور عوام کے ساتھ یکجہتی کے ساتھ کھڑے ہیں۔ وزیر اعظم نے اس اہم ذمہ داری کو سنبھالنے پر رہبر معظم مجتبی خامنہ ای کو مبارکباد دیتے ہوئے اس امید کا اظہار کیا کہ ان کی قیادت آنے والے سالوں میں امن، استحکام، وقار اور خوشحالی کی طرف ایران کی رہنمائی کرے گی۔ وزیر اعظم نے کہا پاکستان اور ایران کے تعلقات مشترکہ عقیدے، تاریخ ، ثقافت اور زبان پر مبنی ہیں۔ انہوں نے ایران کے ساتھ مل کر کام جاری رکھنے کے لئے پاکستان کے عزم کا اعادہ کیا تا کہ دونوں برادر ممالک کے مفاد کے لئے باہمی دلچسپی کے تمام شعبوں میں دو طرفہ تعاون کو مزید مستحکم کیا جا سکے۔ اپنے خط میں وزیر اعظم نے رہبر معظم مجتبی خامنہ ای کی صحت اور کامیابی اور ایران کے برادر عوام کے لئے امن، استحکام اور خوشحالی کے لئے بھی دعائ کی۔ علاوہ ازیں وزیر اعظم کے زیر صدارت موجودہ علاقائی صورتحال کے پیش نظر کفایت شعاری اور توانائی کی بچت کے حوالے سے حکومت کے اعلان کردہ اقدامات کے نفاذ پر جائزہ اجلاس ہوا۔ اجلاس میں ہفتہ وار اضافی چھٹی جمعہ کے روز کرنے کا فیصلہ کیا گیا۔ وزیر اعظم نے کہا حکومت ہر ممکن کوشش کر رہی ہے کہ عالمی حالات کے باوجود معیشت کو مستحکم رکھا جائے۔ کفایت شعاری اور توانائی کی بچت کے حوالے سے حکومت کے اعلان کردہ اقدامات پر نائب وزیر اعظم و وزیر خارجہ اسحاق ڈار کے زیر قیادت ایک خصوصی کمیٹی کر دی گئی جو کہ روزانہ کی بنیاد پر اقدامات کا جائزہ لے کر رپورٹ پیش کرے گی۔ وزیر اعظم نے تمام وفاقی وزارتوں اور ڈویڑنز کو سادگی، کفایت شعاری اور توانائی کے بچت کے حوالے سے اقدامات کو بھر پور طریقے سے نافذ کرنے کی ہدایت کی اور کہا کہ تمام وزارتیں اور ادارے کفایت شعاری کے تحت بند کی گئی گاڑیوں کی تصاویر کابینہ ڈویڑن کو بھیجیں۔ مزید برآں وزیر اعظم کے زیر صدارت ایف بی آر کے امور پر ہفتہ وار جائزہ اجلاس ہوا جس میں وزیر اعظم نے ٹیکس محصولات میں اضافے کے لئے زیادہ سے زیادہ پیداواری شعبوں کو خود کار نگرانی کے دائرہ کار میں لانے کی ہدایت کی۔ وزیر اعظم نے ہدایت کی کہ ایف بی آر محصولات میں اضافے اور ٹیکس چوری کے سدباب کیلئے انفورسمنٹ کو مزید موثر بنائے۔ وزیر اعظم نے ڈرگ ریگولیٹری اتھارٹی کو ملک میں تیار کردہ ادویات کی سیر یکلائزیشن جلد از جلد مکمل کرنے کی ہدایت کی۔
5
