غزہ: مقبوضہ فلسطین میں اسرائیلی فوج کے حملے میں 2 فلسطینی نوجوان شہید ہوگئے جبکہ ایک بم دھماکے میں 4 اسرائیلی فوجی بھی زخمی ہوگئے۔
میڈیاکے مطابق مقبوضہ فلسطین کے محصور علاقے غزہ میں اسرائیلی فوج کی فائرنگ سے 2 فلسطینی شہید ہوگئے۔ شہدا کی شناخت سلام صباح اور عبداللہ ابو شیخ کے نام سے ہوئی اور دونوں کی عمر 17 سال تھی۔ صہیونی فوج نے ان نوجوانوں کو سرحد کے قریب نشانہ بنایا۔
دوسری جانب غزہ اور اسرائیل کی سرحد پر بم دھماکے میں 4 اسرائیلی فوجی زخمی ہوگئے۔ امدادی اہلکاروں نے زخمی فوجیوں کو اسپتال منتقل کیا جہاں 2 فوجیوں کی حالت تشویش ناک بتائی جاتی ہے۔
تحقیقات کے مطابق اسرائیلی فوج کو دیسی ساختہ بم سے نشانہ بنایا گیا جبکہ حملے کی ذمہ داری کسی تنظیم نے قبول نہیں کی۔ واقعے کے بعد اسرائیلی فوج نے جنگی طیاروں اور ٹینکوں سے غزہ پر بمباری اور شدید گولہ باری کی۔
واضح رہے کہ 2014 میں غزہ کی حکمراں جماعت حماس اور اسرائیل کے درمیان جنگ ہوئی تھی جس میں 2300 سے زائد فلسطینی شہید اور 70 اسرائیلی فوجی ہلاک ہوئے تھے۔
700
